'ही प्रजाती फक्त भंगारात आढळते'; मलिकांच्या ट्विटला नितेश राणेंचं प्रत्युत्तर

मुंबई | राज्य विधिमंडळाच्या हिवाळी अधिवेशनाचा पहिला दिवस आमदार भास्कर जाधव (Bhaskar Jadhav) यांनी पंतप्रधान नरेंद्र मोदी (PM Narendra Modi)यांच्या केलेल्या नकलेने गाजला. तर दुसऱ्या दिवशी चर्चा होती ती भाजप आमदार नितेश राणे (Nitesh Rane) यांनी पर्यावरण मंत्री आदित्य ठाकरे (Aditya Thackeray) यांच्या उडवलेल्या खिल्लीची.

आदित्य ठाकरे विधानभवनात प्रवेश करत असताना विधीभवनाच्या पायऱ्यांवर बसून आंदोलन करणाऱ्या आमदार नितेश राणे (Nitesh Rane) यांनी त्यांना डिवचल्याचं पाहायला मिळालं.

नितेश राणे यांनी आदित्य ठाकरे यांना पाहून म्याऊ… म्याऊच्या घोषणा दिल्या. नितेश राणे यांच्या या कृतीवर भाजपचे इतर नेतेही हसत होते. नितेश राणे यांनी केलेल्या कृत्यावर काल शिवसेनेने (ShivSena) जशास तसं उत्तर दिलं होतं.

आदित्य ठाकरे यांच्या समर्थनार्थ आता महाविकास आघाडीतील राष्ट्रवादी काँग्रेसही (NCP) सरसावली आहे. राष्ट्रवादी काँग्रेसचे नेते आणि अल्पसंख्याक मंत्री नवाब मलिक (Nawab Malik) यांनी ट्विटरवर एक फोटो शेअर केला आहे.

नवाब मलिक यांनी आपल्या ट्विटर अकाऊंटवर कोंबड्याचा फोटो शेअर केला आहे, पण हा कॉकटेल कोंबडा आहे. कोंबड्याचा चेहऱ्यावर मांजरीचा चेहरा चिकटवण्यात आला आहे.

या फोटवर त्यांनी पैहचान कौन? असं लिहिलं आहे. हा फोटो मॉर्फ्ड करुन बनवण्यात आला आहे. या फोटोतून नवाब मलिक यांचा रोख नेमका कुणाच्या दिशेने आहे याची चर्चा सुरु झाली आहे.

दरम्यान, नवाब मलिक यांनी नाव न घेता अप्रत्यक्षपणे नितेश राणेंवर फोटो ट्विट करत टीका केली होती. आता नवाब मलिकांच्या ट्विटला नितेश राणे यांनी जशास तसं प्रत्युत्तर दिलं आहे. नितेश राणेंनी एक फोटो ट्विट करत नवाब मलिकांवर टीकास्त्र सोडलं आहे. त्यांनी एक फोटो ट्विट करत त्याला ही प्रजाती फक्त भंगारात आढळते, असं कॅप्शन दिलं आहे.