भारताकडून रशियाला 1 अब्ज डॉलरचे साह्य

व्लादिवोस्टोक : रशियाच्या अतिपूर्वेकडील प्रदेशाच्या विकासासाठी भारताकडून एक अब्ज अमेरिकी डॉलर कर्ज स्वरूपात देण्यात येतील, अशी घोषणा पंतप्रधान नरेंद्र मोदी यांनी गुरुवारी केली. रशियाचा अतिपूर्व प्रदेश हा नैसर्गिक साधन संपत्तीने समृद्ध असा आहे. त्या प्रदेशाच्या विकासासाठी भारत रशियाच्या खांद्याला खांदा लावून उभा असेल, असे मोदी यांनी स्पष्ट केले. ‘इस्टर्न इकॉनॉमिक फोरम’ने आयोजित केलेल्या पाचव्या परिषदेमध्ये ते बोलत होते.

अशा पद्धतीने भारताने आतापर्यंत कोणत्याही देशाला कर्जाऊ स्वरूपात मदत केलेली नाही. त्यामुळे दोन्ही देशांच्या संबंधाचा विचार केल्यास या घोषणेला वेगळ्या स्वरूपातून पाहिजे जात आहे.

अशा निर्णयांमुळे दोन्ही देशांमधील आर्थिक धोरणांवर सकारात्मक अशाच स्वरूपाचा परिणाम होईल. त्याचप्रमाणे दोन्ही देशांमधील अनेक भागांचा वेगाने विकास होण्यास मदत होईल, अशी अपेक्षाही पंतप्रधान मोदी यांनी व्यक्त केली.

पंतप्रधान नरेंद्र मोदी यांनी मलेशियाचे पंतप्रधान मोहम्मद महातीर यांच्याशी चर्चा केली आणि वादग्रस्त धर्मगुरू झाकीर नाईक याला भारताच्या ताब्यात देण्याचा मुद्दा उपस्थित केला. इस्लामचा प्रचार करण्याचा दावा करणाऱ्या झाकीर नाईकवर दहशतवादाला प्रोत्साहन देण्याचे आणि पैशांची अफरातफर केल्याचे अनेक आरोप असून, तो भारताला अनेक खटल्यांमध्ये ‘वाँटेड’ आहे.

‘इस्टर्न इकॉनॉमिक फोरम’ने आयोजित केलेल्या पाचव्या परिषदेमध्ये मोदी आणि महातीर यांची भेट झाली. त्यावेळी पंतप्रधान मोदी यांनी झाकीरचा मुद्दा उपस्थित केला आणि त्याला भारताच्या स्वाधीन करण्याची जोरदार मागणी केली.

दरम्यान, जम्मू-काश्मीरला विशेष दर्जा देणारे कलम 370 भारताने का हटवले आणि जम्मू-काश्मीर तसेच लडाखला केंद्रशासित प्रदेशाचा दर्जा का दिला, या संदर्भातही पंतप्रधान मोदी यांनी महातीर यांना माहिती दिली, अशी माहिती परराष्ट्र सचिव विजय गोखले यांनी पत्रकारांना दिली. 

 

महत्वाच्या बातम्या-