“मोदींनी पंतप्रधानपदी बसवणाऱ्या महाराष्ट्रातील मतदारांचा अपमान केलाय”

नवी दिल्ली | कोरोना महासाथीच्या सुरुवातीच्या काळात देशभरात कोरोना पसरवण्याचं काम महाराष्ट्रातील काँग्रेसनं केलं. काँग्रेसनं यूपी-बिहारींना मुंबईतून बाहेर जाण्यासाठी उकसवलं. लॉकडाऊनमध्ये मजुरांना रेल्वेची मोफत तिकिटे काढून दिली. राज्यातील काँग्रेस कार्यकर्ते स्टेशन बाहेर उभे राहून स्थलांतरीत मजुरांना राज्याबाहेर पाठवण्यासाठी प्रयत्न करत असल्याचं सांगून त्यांनी महाराष्ट्र काँग्रेसनंच देशभरात कोरोना पसरवल्याचा आरोप पंतप्रधान नरेंद्र मोदींनी केला.

याला राष्ट्रवादीच्या नेत्या आणि खासदार सुप्रिया सुळेंनी प्रत्युत्तर दिलं आहे. सुप्रिया सुळेंनी नरेंद्र मोदींवर सडकून टीका केली आहे. मोदी भाजपचे पंतप्रधान नसून देशाचे पंतप्रधान आहेत, असा टोलाही सुप्रिया सुळे यांनी पत्रकार परिषदेत बोलताना लगावला आहे.

महाराष्ट्राची लेक म्हणून आणि महाराष्ट्राची खासदार म्हणून मी आपल्याला प्रश्न विचारतेय की, आपण महाराष्ट्राबद्दल गैरसमज पसरवणारं वक्तव्य का केलं? असं राष्ट्रवादीच्या खासदार सुप्रिया सुळे यांनी पंतप्रधान मोदींना उद्देशून म्हटलं आहे.

दीड तासांचं पंतप्रधानांचं भाषण झालं. खूप अपेक्षेनं मी त्या भाषणाकडे पाहत होते. कारण खूप अडचणीच्या काळातून आपला देश चालला आहे. महामारीतून संपूर्ण जग हळूहळू बाहेर पडतंय. त्यामुळे माननिय पंतप्रधानांनी आपल्या सर्वांना एक दिशा द्यावी, अशी अपेक्षा होती. पण दुर्दैव की, आपल्या महाराष्ट्राबाबत पंतप्रधान जे बोलले ते दुर्दैवी, असं सुप्रिया सुळेंनी म्हटलंय.

मला स्वतःला वैयक्तिकपणे दुःख देणारी गोष्ट. ज्या राज्यानं फुल न फुलाची पाकळी म्हणा. पण 18 खासदार भाजपला महाराष्ट्रानं निवडून दिले आहेत. म्हणजे, मोदींना पंतप्रधान होण्यासाठी महाराष्ट्रातील मतदारांचा मोठा वाटा आहे. त्या महाराष्ट्राच्या मतदारांचा आणि महाराष्ट्राचा अपमान कोविड सुपर स्प्रेडर म्हणून त्यांनी केला. हे अत्यंत धक्कादायक आणि दुर्दैवी आहे. ते भाजपचे पंतप्रधान नसून देशाचे पंतप्रधान आहेत, असं राष्ट्रवादीच्या खासदार सुप्रिया सुळे म्हणाल्या.

एका पक्षाच्यावतीनं पंतप्रधान बोलत होते हे पाहून मला दुखः झालं. पंतप्रधानांचा मान सन्मान सगळ्यांनीच केला पाहिजे आणि त्यामध्ये पक्ष येत नाही. ते पद पक्षाचं नाही. मोदी भाजपचे पंतप्रधान नसून देशाचे पंतप्रधान आहेत, अशी आठवणही सुप्रिया सुळेंनी मोदींना करून दिली आहे.

महत्वाच्या बातम्या- 

मोदींच्या ‘त्या’ वक्तव्यावर महाराष्ट्रात संताप; ट्विटरवर #महाराष्ट्रद्रोही_BJP हॅशटॅग होतोय ट्रेंड! 

अभिमानास्पद! शेतकऱ्याच्या लेकराची मोठी झेप; बुलडाण्याचा राजू केंद्रे फोर्ब्सच्या यादीत झळकला 

“जशी लता मंगेशकर यांनी आंबेडकरी गाणी गायली नाहीत तशी…” 

‘…म्हणून मी काँग्रेसची साथ सोडली’; आठवलेंनी कारण सांगताच संपूर्ण सभागृह हसलं 

“शिवाजी पार्क हे शिवाजी पार्कच राहु द्या, त्याची स्मशानभूमी करु नका”