सोलापूर | एसटी संपामुळे गेल्या दोन महिन्यांपासून अनेक कर्मचाऱ्यांचे आणि प्रवाशांचे हाल होत आहेत. एसटी संप चिघळल्यानं अनेकांना वाईट परिस्थितीचाही सामना करावा लागला.
एसटी कर्मचाऱ्यांच्या संपामुळे प्रवाशांना मोठ्या अडचणींना तोंड द्यावं लागत आहे. अशातच अजूनही कर्मचाऱ्यांचा संप काही मिटेना. त्यामुळे सरकारनंही कडक पावलं उचलायला सुरुवात केली आहे.
अनेक मागण्यांसह एसटी कर्मचाऱ्यांनी सुरू केलेले आंदोलन अद्यापही पूर्णपणे संपायचं नाव घेईना. त्यामुळे महामंडळाने संपात सहभागी झालेल्या कर्मचाऱ्यांविरोधात कारवाईचा बडगा उचलला आहे.
दिवसेंदिवस हा संप चिघळतच चालला आहे. त्यामुळे सगळीकडे चिंतेचे वातावरण निर्माण झालं आहे. यातच काही आगारांनी संप मागे घेण्याचा निर्णय घेतला आहे. तर काही आगारातील कर्मचारी अजूनही संप मागे घेण्यास तयार नाहीत.
एसटी संपामुळे अनेकांनी धक्कादायक पावलंही उचलली आहेत. अनेकांवर हालाकिची वेळ आली आहे. बिकट परिस्थितीचा सामना करत असताना अनेकांच्या कुटुंबियांचाही बांध तुटलेला पहायला मिळाला.
अशातच आणखी एक धक्कादायक बातमी समोर आली आहे. एका एसटी कर्मचाऱ्याच्या मुलाने आईच्या साडीनं गळफास घेत आत्महत्या केली आहे.
अमर तुकाराम माळी असे आत्महत्या केलेल्या तरुणाचे नाव असून तो अवघ्या 20 वर्षांचा होता. सोलापूरमधील या अमरने वडील तुकाराम माळी यांना पैशाची मागणी केली. मात्र संपामुळे दोन तीन महिने पगार नाही, काम बंद आहे तुला पैसे कुठून देऊ असं वडिलांनी हताश होऊन सांगितलं.
अमरसोबत बोलणं झाल्यावर ते संपात सहभागी होण्यासाठी निघून गेले. अमरही त्याच्या कामासाठी बाहेर गेला. घरी परतल्यावर आईने त्याला जेवायला सांगितले. मात्र त्यानं आराम करायचाय म्हणत आपल्या खोलीत जाऊन हे धक्कादायक पाऊल उचललं.
बराच वेळ झाला तरी अमर खोलीच्या बाहेर आला नाही म्हणून आईनं त्याला आवाज दिला. मात्र समोरुन कुठलाही प्रतिसाद आला नाही. त्यामुळे आईने आमरच्या मोठ्या भावाला बोलावलं. त्यानंही हाक मारल्या पण त्यालाही प्रतिसाद मिळाला नाही. त्यानंतर मोठ्या भावानं खिडकीतून आत पाहिलं असता अमरने आईच्या साडीने गळफास घेतला होता.
माझा पगार झाला नसल्यानं तुला पैसे देता आले नाहीत असं सांगत अमरच्या वडिलांनी हंबरडा फोडला. या घटनेनं सगळ्यांनाच धक्का बसला आहे.
महत्त्वाच्या बातम्या –
‘या’ ठिकाणी शाळा बंदच राहणार, धडकी भरवणाऱ्या आकडेवारीनं चिंतेत भर
गोडसेच्या भूमिकेवर अमोल कोल्हेंचं स्पष्टीकरण, म्हणाले “एक कलाकार म्हणून…”
“हत्तीच्या येणाऱ्या बाळाचं नाव ‘चंपा’ आणि माकडाच्या बाळाचं नाव ‘चिवा’ ठेवू”
प्रज्ञा सिंग ठाकूर म्हणतात, “दारू म्हणजे औषध, आयुर्वेदात…”
अमोल कोल्हेंच्या भूमिकेवर आव्हाड नाराज म्हणाले, “कलाकाराचा वेष घेऊन तुम्ही…”
